ഖുര്‍ആനിക അധ്യാപനം സൗഹാര്‍ദവും സമാധാനവും: പേരോട്

കാഞ്ഞങ്ങാട്: വിശുദ്ധ ഖുര്‍ആന്‍ അവതീര്‍ണമായ മാസമാണ് വിശുദ്ധ റമസാനെന്നും ഖുര്‍ആന്‍ ഉത്‌ഘോഷിക്കുന്നത് സമാധാനവും സൗഹാര്‍ദവുമാണെന്നും എസ് വൈ എസ് സംസ്ഥാന ജനറല്‍ സെക്രട്ടറി പേരോട് അബ്ദുറഹ്മാന്‍ സഖാഫി പറഞ്ഞു. ബെല്ലാകടപ്പുറം യൂനിറ്റ് എസ് വൈ എസ് സംഘടിപ്പിച്ച വിശുദ്ധ റമസാന്‍ മുന്നൊരുക്ക പ്രഭാഷണം നടത്തുകയായിരുന്നു അദ്ദേഹം.

വിശുദ്ധ ഖുര്‍ആന്‍ അവതരിച്ചതിന്റെ വാര്‍ഷികമാണ് റമസാന്‍. അതില്‍ ഏറ്റവും ശ്രേഷ്ഠമായ ലൈലത്തുല്‍ ഖദ്്‌റിന്റെ രാത്രിപോലും പ്രാര്‍ഥനക്ക് ഉത്തരം ലഭിക്കണമെങ്കില്‍ വിശ്വാസികള്‍ക്കിടയില്‍ അനൈക്യവും പിണക്കവും സൃഷ്ടിക്കാതെ ആത്മവിശുദ്ധിയോടെ ജീവിക്കേണ്ടതുണ്ട്.നയനങ്ങള്‍ നനഞ്ഞ് അഹങ്കാരവും വിദ്വേഷവും അസൂയയുമില്ലാതെ ലോകസ്രഷ്ടാവിനോട് പ്രാര്‍ഥിക്കുന്ന ലോലഹൃദയത്തിന്റെ ഉടമകളായി മുഴുവന്‍ വിശ്വാസികളും വരേണ്ടതുണ്ട്. റമസാനിനെ സ്വീകരിക്കാന്‍ മനസിന്റെ ഉള്ളില്‍നിന്നും പാപമോചനത്തിന് വേണ്ടിയുള്ള പ്രാര്‍ഥനകള്‍ ഉണ്ടാകണം. കാരുണ്യപ്രവര്‍ത്തനങ്ങളില്‍ കൂടുതല്‍ ശ്രദ്ധ പതിക്കണം -അദ്ദേഹം പറഞ്ഞു.

ഇന്ത്യാ രാജ്യം എല്ലാ വിഭാഗം ജനങ്ങള്‍ക്കും ആശയപ്രചാരണത്തിന് സ്വാതന്ത്ര്യം നല്‍കുന്ന ഭരണഘടന നിലനില്‍ക്കുന്ന രാജ്യമാണ്. ഇന്ത്യന്‍ ഭരണഘടന അനുവദിക്കുന്ന മാര്‍ഗങ്ങളിലൂടെ സുന്നി സംഘടനകള്‍ അതിന്റെ ആശയ പ്രചാരണവും വിദ്യാഭ്യാസരംഗത്തെ പ്രവര്‍ത്തനവും സാധുസംരക്ഷണ പരിപാടികളിലും പങ്കുചേരണമെന്നും അദ്ദേഹം ഉത്‌ഘോഷിച്ചു.

എസ് വൈ എസ് ജില്ലാ പ്രസിഡന്റ് പള്ളങ്കോട് അബ്ദുല്‍ ഖാദിര്‍ മദനി അധ്യക്ഷത വഹിച്ചു. സയ്യിദ് കുറാ തങ്ങള്‍ പ്രാര്‍ഥന നിര്‍വഹിച്ചു. കെ കെ എസ് തങ്ങള്‍ ബേക്കല്‍, സുലൈമാന്‍ കരിവെള്ളൂര്‍, അശ്‌റഫ് കരിപ്പൊടി, ബശീര്‍ മങ്കയം, സി എച്ച് ആലിക്കുട്ടി ഹാജി, മടിക്കൈ അബ്ദുല്ല ഹാജി, സി എ ഹമീദ് മൗലവി, മദനി ഹമീദ്, അശ്‌റഫ് അശ്‌റഫി പ്രസംഗിച്ചു. അബ്ദുറശീദ് സഅദി സ്വാഗതവും മുസ്തഫ ഫൈസി നന്ദിയും പറഞ്ഞു.

 ബെല്ലാ കടപ്പുറം സുന്നി സമ്മേളനം കലക്കാനുള്ള ഇ കെകാരുടെ ശ്രമം പോലിസ് വിഫലമാക്കി

കാഞ്ഞങ്ങാട്: ഇ കെ വിഭാഗം സുന്നികളുടെ കടുത്ത ഭീഷണി അവഗണിച്ച് കാസര്‍കോട് ബെല്ലാ കടപ്പുറത്ത് അത്യുജ്ജ്വല സുന്നി സമ്മേളനം നടന്നു. സമ്മേളനം കലക്കാന്‍ ശ്രമിച്ച ഇരുന്നൂറോളം വരുന്ന ഇ കെ വിഭാഗം പ്രവര്‍ത്തകരെ പോലീസ് ലാത്തിവീശിയും ഗ്രനേഡ് പ്രയോഗിച്ചും ഓടിച്ചു. സുന്നി സമ്മേളനം നടക്കുന്നതില്‍ അരിശം പൂണ്ട് കാഞ്ഞങ്ങാട്ടും ബല്ലാകടപ്പുറത്തും എസ് കെ എസ് എസ് എഫുകാര്‍ അഴിഞ്ഞാടുകയായിരുന്നു. എസ് എസ് എഫ് പ്രവര്‍ത്തകന്റെ ബല്ലാകടപ്പുറത്തെ വീടും കാഞ്ഞങ്ങാട്ടെ ട്രാവല്‍ ഏജന്‍സി സ്ഥാപനവും കല്ലെറിഞ്ഞു തകര്‍ത്തു. ബൈക്ക് തീവെച്ച് നശിപ്പിച്ചു.
ഇന്നലെ പുലര്‍ച്ചെയാണ് കാഞ്ഞങ്ങാട്ടെ മദനി ട്രാവല്‍സ് ഉടമ ബല്ലാ കടപ്പുറത്തെ ഹമീദ് മദനിയുടെ ബൈക്ക് എസ് കെ എസ് എസ് എഫുകാര്‍ തീവെച്ച് നശിപ്പിച്ചത്. ഇന്നലെ ഉച്ചയോടെ ഹമീദിന്റെ വീടിനുനേരെ കല്ലേറുണ്ടായി. തുടര്‍ന്ന് കാഞ്ഞങ്ങാട്ടെ മദനി ട്രാവല്‍സിനു നേരെയും എസ് കെ എസ് എസ് എഫുകാര്‍ കല്ലെറിഞ്ഞു. എസ് വൈ എസ്, എസ് എസ് എഫ് ബല്ലാ കടപ്പുറം യുനിറ്റ് സംഘടിപ്പിച്ച റമസാന്‍ മുന്നൊരുക്ക സമ്മേളനം അലങ്കോലപ്പെടുത്താന്‍ ലക്ഷ്യമിട്ട് ബല്ലാകടപ്പുറത്ത് ഇന്നലെ ഉച്ചയോടെ ലീഗ്-എസ് കെ എസ് എസ് എഫ് പ്രവര്‍ത്തകര്‍ ബാധപൂര്‍വം അക്രമം അഴിച്ചുവിടുകയായിരുന്നു.
വിവരമറിഞ്ഞ് ഹൊസ്ദുര്‍ഗ് എസ് ഐ. വി വി സുധാകരന്റെ നേതൃത്വത്തിലുള്ള പോലീസ് സംഘം സ്ഥലത്തെത്തി അക്രമികളായ എസ് കെ എസ് എസ് എഫുകാരെ വിരട്ടിയോടിക്കാന്‍ ശ്രമിച്ചെങ്കിലും ഇവര്‍ പിന്തിരിഞ്ഞില്ല. തുടര്‍ന്ന് പോലീസ് ഇവര്‍ക്കു നേരെ ഗ്രനേഡും കണ്ണീര്‍വാതകവും പ്രയോഗിച്ചു.
എസ് വൈ എസിന്റെ റമസാന്‍ മുന്നൊരുക്ക സമ്മേളനം ഹമീദ് മദനിയുടെ പറമ്പില്‍ നടത്താനാണ് തീരുമാനിച്ചിരുന്നത്. ഇതിനു പോലീസ് അനുമതിയും നല്‍കിയിരുന്നു. എന്നിട്ടും സമ്മേളനം നടത്താന്‍ അനുവദിക്കില്ലെന്നു പ്രഖ്യാപിച്ച് എസ് കെ എസ് എസ് എഫുകാര്‍ കുഴപ്പങ്ങളുണ്ടാക്കുകയായിരുന്നു. ക്രമസമാധാനപ്രശ്‌നം രൂക്ഷമായതിനെ തുടര്‍ന്ന് റമസാന്‍ മുന്നൊരുക്ക സമ്മേളനം പോലീസ് സംരക്ഷണത്തോടെ കുശാല്‍ നഗറിലെ ഗാര്‍ഡര്‍ വളപ്പിലാണ് നടത്തിയത്. മുമ്പ് ബല്ലാ കടപ്പുറത്ത് റമസാന്‍ മുന്നൊരുക്ക സമ്മേളനം നടത്താന്‍ തീരുമാനിച്ചിരുന്നവെങ്കിലും എസ് കെ എസ് എസ് എഫുകാര്‍ പ്രശ്‌നങ്ങളുണ്ടാക്കിയതിനെ തുടര്‍ന്ന് മാറ്റിവെക്കുകയായിരുന്നു.
അക്രമവുമായി ബന്ധപ്പെട്ട് ഹൊസ്ദുര്‍ഗ് പോലീസ് കേസെടുത്ത് അന്വേഷണമാരംഭിച്ചിട്ടുണ്ട്. സംഘര്‍ഷാവസ്ഥ കണക്കിലെടുത്ത് കാസര്‍കോട്ടുനിന്നും കൂടുതല്‍ പോലീസ് സേനയെ വിന്യസിച്ചിട്ടുണ്ട്.